آفاق حرة للثقافة صحيفة ثقافية اجتماعية الكترونية
جايه المراكب والأمـل زوادهـــا
راكبين عليها بناتها ويا ولادهــا
لبـوا الـنـدا اول إشاره وندهــــه
مـينا وحـسـن وتريزا ويا بهــيه
—————————-
جايه المراكب شقه موجة نيــــلهــــا
وشبابها الاخضر ورد بيغـــنيلهـــــا
مين اللى يقدر يوم يهد ف حيلـــــها
طول م الولاد صاحيين لكل رزيـَّه
—————————-
جايه المراكب بالمـكـــن دواره
تغزل خيوط القطن يا نــــواره
نكـبر شويه شـويه بالقطــــاره
عايقين كده باللاسه والجلابيـه
—————————
جايه المراكب ثوره ليها أصولـــــها
من ألف عام مستنيين ف وصولــهـا
وألف ديب واقــفين كده يبصولــــها
يحكميك يا مصري من عيونهم ديـه
————————–
جايه المراكب يونس انت أملهـــا
الحوت ممد م الجنوب لشمالهــــا
حوتك رحيم وحوتنا سارق مالها
ادعي لنا ربك تبقى ايدنا قويــــه
————————–
جايه المراكب وايزيس ويــَّــاهـا
حورس بيبكي بحزن ويا بكاهـا
دلوقتي لازم تبقى إيـدنا معاهـــا
أوزريس حتت متقطعه ومرميه
—————————
جايه المراكب بس فيها فراعـــنه
عارفـين ألآمنا وكل ما يوجعنـــا
لكنه ( مـينــا ) من زمان ودعـنا
فضعنا بين اهـبل وبين حرامـيـه
