آفاق حرة للثقافة صحيفة ثقافية اجتماعية الكترونية
زمان كنا .. ونحن صغار
زمان نسمع
جبوتي تحت .. جبوتي فوق
جبوتي تحت جيعانة
جبوتي فوق شبعانة
وصرنا اليوم كما كانت
جبوتي لمّا كنا صغار
عدن واتقسّمت ثنتين
عدن لأصحابنا اللي فوق
عدن حلوة .. صغيّورة
وحبّوبة .. وأموّرة
وفيها الناس في نعمة
وفي تخمة
وفي السهرات محلاهم
يناجوا الليل والنجمة
ووحدة ثانية جنبــِه
عدن لاحبابنا اللي تحت
عدن غبرا تعيش الويل
نهارِه ليل .. وليلــِه ليل
وطول الوقت تعبانة
وضبحانة .. وجيعانة
وتحلم والله باللقمة
وهي صابر.. ولاكلمة
وذيك تضحك وتتكركر
وذي تبكي وتتذكّر
وذيك ترقص وتتقفّز
وذي تشكي وتتفزفز
وذيك تفخر بأموالـِه
وذي تفحر من أحوالـِه
عدن واتقسّمت ثنتين
مابين سارق .. وبين مسروق
عرفتوا ياعباد الله
منوه اللي تحت؟
منوه اللي فوق؟
