المسلّة/بقلم:مصطفى الجارحي (مصر)

كل دُرج فـ قلبي مسموح تفتحيه
كل أرنب نط من صدري يجري وراكي
مسموح تدبحيه
وتلوّني الدنيا أغاني
رجليّا سبقتني لباب بيتك
وانا لسّه بـ احلق دقني ماغسلتش سناني
كان نفسي آخد بيتك معايا نتمشّى
نتغدّا.. نتعشّى
ندخل سينما ونزور الحسين
لكن عينيكي مركبين
من ساعة مانزلوا البحر مارجعوش
أصعب سؤال جوايا لسّه ماسألتوش
أشتاق لقلبك وطن
تسيبيني في المنفى
واشتاق لحضنك سكن
يبى السراب أوفَى
فاكرة لما لمستك
فضحكت العصافير وعششت فـ عينيكي
فاكرة لما حضنتك
فبقيتي قطة كسلانة وشمسي بتدّفيكي
وتهت عن سكتك
فبصّيت على رجليا ماعرفتهمش
وقشّرت جسمي ورميت كل حتّة فـ حتّة
عشان أعد جروحي على مهلي
واقعد مع روحي وانتي جواها
أنا من ساعتها واخداني ندّاهة (!)
…
…