آفاق حرة للثقافة صحيفة ثقافية اجتماعية الكترونية
خرج ابن آدم من العدم قلت : ياه
رجع ابن آدم للعدم قلت : ياه
تراب بيحيا … وحي بيصير تراب
الأصل هو الموت ولا الحياه ؟
عجبي !!!
********************
ضريح رخام فيه السعيد اندفن
و حفره فيها الشريد من غير كفن
مريت عليهم .. قلت يا للعجب
لاتنين ريحتهم لها نفس العفن
عجبي !!!
**********************
ياما صادفت صحاب و ما صاحبتهمش
و كاسات خمور و شراب و ما شربتهمش
أندم علي الفرص اللي أنا سبتهم
و الا علي الفرص اللي ما سبتهمش
عجبي !!
****************************
و الكون ده كيف موجود من غير حدود
و فيه عقارب ليه و تعابين ودود ؟؟
عالم مجرب فات و قال سلامات
ده ياما فيه سؤالات من غير ردود
عجبي !!!
***********************
أنا شاب لكن عمري ألف عام
وحيد لكن بين ضلوعي زحام
خايف و لكن خوفي مني أنا
أخرس و لكن قلبي مليان كلام
عجبي !!!!
*************************
يا باب يا مقفول … إمتي الدخول
صبرت ياما و اللي يصبر ينول
دقيت سنين … و الرد يرجع لي : مين ؟
لو كنت عارف مين أنا كنت أقول
عجبي !!!
********************************
علم اللوع اضخم كتـــــــــاب في الأرض
بس اللي يغلط فيه يجيـــــــــبــه الأرض
أما الصراحة فأمرها ســـــــــــــــــاهل
لكن لا تجلب المال و لا تصون العرض
عجبي !!!
****
عبثا باقول واقرا في سورة عبس
ماتلومش حد إن ابتسم أو عبس
فيه ناس تقول الهزل يطلع جــــد
و ناس تقول الجد يطلع عبـــــث
عجبي !
****
زحام و أبواق سيارات مزعجـــــة
للي يطول له رصيف.. يبقي نجـــا
لو كنت جنبي يا حبيبي أنــــــــــــا
مش كنت أشوف إن الحياة مبهجة
عجبي!!
ورا كل شــباك ألف عــين مفتوحـــــــــــــــــــين
وأنا وانتي ماشيين في الطريق يا غرامي الحزيـن
لو التصــقـنا نموت بضربة حجـــــــر
ولو افترقـــــــنا نموت متحســـــرين
عجبي!!
لا تجــبر الانســان ولا تخــــيره
يكفيه ما فيه من عقـل بيحــيره
اللي النهارده بيطلبه ويرتضيه
هو اللي بكره ها يشتهي يغيره
عجبي!!
