آفاق حرة للثقافة صحيفة ثقافية اجتماعية الكترونية
كان فاضل تقريباً ساعه علي وش الفجر
وخيوط الضي بتتمطع علي ضهر الارض
فتزيح العتمه المكبوبه علي جسم البدر
وتحدد ساعتك ومكانك بخطوط العرض
الكون كان واقف يتفرج
لكن مذهول
فرق التوقيت بين اعمارنا
مرهون بمسافة خط الطول
اوزارنا وسكة مشوارنا
مزروعه تخبيط
علي دق طبول
مشهد اول
والمنظر كله بيتحول
يلبس ارجوز او يتسول
ويجيب من بكره لعام نول
قوم جاب بكره
لكن في الغابه مافيش بكره غير للي يسود
الغابه هتفضل طبيعتها تحكمها اسود
مشهد تاني
في ايات الحسن الرباني
لخبط قوافيا واوزاني
ابو النواس والرحماني
بيصبوا السوبيا لأجمل عود
والعود تقلان
العود خجلان
هزلان
بهتان
العود دبلان
مرضان
هلكان
العود شارب طنين احزان
مش واخد نفسه من النهجان
مشهد تالت
ده من المشاهد اللي اتشالت
ماتسيبش السايب في الفالت
عماليق بيحارب في الأقزام
وعبيد وجواري وكله بكام
والصبر شيطان زغدوه قوم قام
والدنيا اتقلبت قوم مالت
مالت علي مين
مالت بالطول واتدلقت دلق
طرطشت الخوف في وشوش الخلق
عصفور كان نايم متأخر مش عاجبه الصوت
هاتك صوصوه لم الصوصوه ملت الملكوت
صياد سمعه
ضربه بطلقه فسقاه الموت
الفار بيراقب في المشهد ويقول مجانين
القط متابع ومقرر يتعشي بمين
الشوطه اما بتيجي في زرعه
لابتعرف هزلان ولا تخين
اهي دي القوانين
الاقوي هو اله الكون
والباقي طبعا بني ادميين
