آفاق حرة للثقافة صحيفة ثقافية اجتماعية الكترونية
سامع صمتك حاسس بيك
اوعي المحنه فيك تحنيك
وسط ظلام الكون راح تلمس
قوه بتشرق منك فيك
لامس وجعك فيك ومسيطر
عمري ما أطالبك تعمل عنتر
عيش أوجاعك فترة و أعبر
خوفك منها هوا الأخطر
شايف عجزك ماحي الشوف
عامل وحش وواكلك خوف
اُطرد أي شعور مهزوم
و بلاش تتحجج بظروف
ليه شارب من كاس مش كاسك
ليه بايع لفراغ إحساسك ؟
دور جوا الروح راح تحضن
فرحه تكون قدك ومقاسك
إنت الغايه لكل سعاده
ليه تايه حيران كالعاده ؟
خش العمق ولامس قلبك
أصل الحب مشاعره عباده
ليه بايع عمرك ببلاش
حلمك يستاهل يتعاش
إمسك ف الافراح أُحضنها
أصل الفرحه ما تستناش
