آفاق حرة للثقافة صحيفة ثقافية اجتماعية الكترونية
يا قمر أينك مُغَيِّب؟
ليش عنَّا تَرتحلْ
فرحتي لمَّا أشوفك
بدر باهي مُكتمِلْ
عُمرنا يا بدر.. ولَّى
بالمواجع نَحتفِلْ
اللي يَشكي ظُلم قاتل
واللي يَبكي من قُتِلْ
يا قمر قلبي تغدغد
من مناكرهم بِسِلْ
كم شكون صبره حرامه
ورد أغصانه ذِبِلْ
مو انا وحدي المُعنَّى؟
أو أنا وحدي ضَبِلْ
يا قمر الحال مُؤلم
كم شنقدر نحتمِلْ
اللي يَشكي واللي يبكي
واللي قلبه يَشتعِلْ
واللي يَحلم بالأماني
ساهن الفَرحه..عَجِلْ
والفرح غادر وولَّى
سار عنا مُرتحلْ
قُل لهم يا بدر: عاده
عاد وقته …ما وصِلْ
موسم البِتله بمبكر
لا يفوت إلا كسِلْ
البتول تعبان مبلي
يشتكي حاله هَزِلْ
باع ثوره وشل صُعبي
يبكي جوعه..بالسفِلْ
حولنا خارب مُدقدق
منصدع صادي وَبِلْ
أهملوه أصبح خرابة
سائله ما يَدَّخِلْ
والذي يهمل حقوله
بالهيانه قد قِبِلْ
لا تثق يا قلب دهرك
بالذي طبعه.. وَجِلْ
لو دعيته..يوم حامي
فر هارب يَختضِلْ
الجبان ما صار شاجع
مهما قلَّد أو عِمِلْ
لا سمع دَقَّه.. تِطارَش
ون رأى نمله ذُهِلْ
هكذا يحيا زمانه
مثل ريشه يَرتقِلْ
والبخيل معليك منه
قِرشه بالقصعه ذحِلْ
واللي ما يعطيش نفسه
كيف شُعطي لو سُئِلْ؟
قلبي يكره كل واطي
إن سُئل حاجه بِخِلْ
يا فؤادي لا تصافِ
غير وافي ما يَمِلْ
والكريم الشهم وِدّه
شل منه وانتَوِلْ
صادِقه خليه صاحب
مش مُهم مو يَشتغِلْ
ما يُهم.. تاجر مُرَيِّش
أو يكون راعي إبلْ
