آفاق حرة للثقافة صحيفة ثقافية اجتماعية الكترونية
من غير فلسفة الشُعرا
ولا رسم أجنه قلبى شعاع م النور
قفل الستارة بيحذف المشهد
ويصحي روح هيمانه ف الحواديت
ف إيديها ماسكة دستتين ألوان
عماله ترسم ملامح قلب مش بيموت
شمس بتلف البيوت كلها
وتخلي م الدنيا اللي بتتملي ألغام
مدينه فاضلة
صورة شيطان بتنتحر بينا
منتظره اكتمال الحلم ف البرواز
دهشة عيون الطيبين ع الأرض
من غير ما حد ينط م المركب
ولا ينجرح م الشوك
أتارى الوردة بتحب القلم الرصاص
فتشوف ملامحها الصادقة طشاش
بالرغم انها بنوته بتجرى
فصل ربيع
بيطبطب على ضهر البياع السريح
الملبوس بالفقر
على تعبير بيشق هدوم الخوف
زوغان الكاميرا على السنيد
إوعاك تتبرع بالبيع
ف زمان الكدب
الحلم الواقع ع الأرض
يموت جواك
عتبه دخولك للحياة وياك
راح تتخنق
من خطاوي مزيفة
انت مش قادر تقنعها
بان السم المركب
مش علاج للعجز
ساعتها روحك مش هاطيقك
وانت بتقتل كل حواسك
سوء فهم
ماتخلونيش عكس اتجاه السير
عشان أقع برغبتى
وأشيل الذنب
عدل شكل اللون
م الغامق المقتول
للفاتح العاشق
يمكن تدرك المعنى
بعد إما نبقي ملايكة ف الصورة
اللي كانت مرسومة من زمان بالفحم
