ياأساتذة فين الكفن/ شعر الشاعرة المصرية الدكتورة منال الشربيني/ الاسكندرية * مصر

غطوه بربع جنيه
وسيبوا رجله عريانة
لا هو عورة ولا كان بيه
ولا يسوى دبانة
لا في ناس حتبكي عليه
ولا عزوة ولا “كانا”

ولو شئتوا… نقطعها
دا مفيش عليها الطلا
ولا ليها 100 لازمة
دي حكايته صبحت بلا
منحوس ومن يومه
ولا له ف “أيوة” و”نو”
ولا يعرف “اللازمة”
عايش ف قلبه شق
وأهو مات من الأزمة
م الهم فوق الغلا
وورا لقمة يشبعها
يبلع 200 جزمة

وعلى فكرة…شيلوا الكفن
ما هو مات ف سره خلاص
ومطرح ما ترسي يغور
ونحفر له في البلاص
مش فارقة يا أساتذة
ملعون أبو الإخلاص