آفاق حرة للثقافة صحيفة ثقافية اجتماعية الكترونية
يا يوم كنا زغار
يا يوم الوعود
يا يوم كانوا زغار
تتمختطر على شفافها البسمة
وتخجل من لمستو لشعرها….. الغرة
وتركض على الجبهة
محنية
متدارية
مسمرة
محمرة ؟!
لا مو محمرة !
هاي مراية وجنتها السمرة
لما بسهولها تفتح الجوري
وغازلو من بين الهداب
الحسون
والطاووس
والدوري
يا يوم كنا زغار
يا أحلى عمر
يمكن بعد بكير
ليصير الأمل ختيار
هي غلبة ترح
خلت الروح عمرها
من الدموع مليار
وكتب تسطر الصفحات
بأنة وجع وتنهيدة جرح
وقصائد نشفت
بأبياتها بحار
يايوم كنا صغار
وعيون تركض عالشباك
تشهد على الشوق
البرادي
والحيطان
وغلقة الباب
وأم
من بعيد تسألو شو باك ؟؟
شب احلى من الحلا
بالبرد والشمس
بالتنين سوى
عم ينطر بلكي عالبلور
ينعكس خيالها مرة
بلكي بيكسر سفرة الروح
عاوجبة من نظرة
وحلوة توميلو
اشتقتلك كتيرر
يا بو بدلة مخضرة
يايوم كنا زغار
على طلالو
بيوقف يومنا وبينحني
شو كانو حنياتو كتار
بيستاهل
الف قبعة
وبرنيطة
وعقال
وكفية
وخودة نرفعلو
وحقو ما راح نوفي
ونبكي على اثارو
وبقايا ذكرياتو
شوية صور مغبشة
رسايل مهمشة
هدايا بعدهن بدرج الوعد
بجيوب الايام
ضاع مفتاحو
ياترى
يا عمر حتى الهديا
عليّها راحوا ؟
