هاذيني هاذيني / بقلم : عبد اللطيف رعري/مونتبولي /فرنسا

1

هاذيني هاذيني

نسَّطَّرْ طريقي للرّحيلْ على طْرَافْ غمامة

 بخْطَاوي ثْقالْ..

ونْجَرْجَرْ حَمْلْ كْثيرْ

ملي مْرَاكبْ الوقت مَتلاَفَة ْ,..

واضْعةْ علَى لوجُوه عَلَّافَةْ

سَمِّيها صَفْصَافةْ..

 سَمِّيها  قَفقَافةْ..

 سَمِّيها قَلةّ صْبرنَا…

سَميها الحكْرةْ اللِّي بيها تكسَرنا ومزَالْ ولاَّفَة

2

هاذِيني هاذيني

 نمشِي…

  غِير نَمشِي شَادْ لَونَاسَة بقلبْ حزينْ

 حتَّى نلقَى جبَّارْ لخْواطرْ

 نتْرَجَّاه السَّلامةْ

والسَّلامة يا مُولانا السَّلامَة..

3

هاذيني هاذيني

نبكِي ونزيدْ فبْكايا

ونقُولْ للشَّمعَة والفنارْ لحْدَايَا

 أنتِ وحتَّى أنتَ مرَايا…

وأنا المجْرُوحْ دَافنْ سَرِّي مْعَايا

 مَا نبُوحْ بيه ونْصِيرْ شْفايا

 مَلِّي  الشِّيخة بين قْدَامْ المجْدوبْ شتَّافَةْ..

النَّملة صَخْرة فْعينْ الفِيلةْ..والشُّوفةْ مَسَافَةْ

وعَكازْ المَظلُومْ ناخْراهْ  حَشْلاَفةْ

وحَافظْ اللسُّونْ وعَالمْ لمتُّونْ فكَارُو نشَّافةْ

عافتْهَا كْلابْ لَقبيلةْ

4

هاذيني هاذيني

نفكْ لْغَازْ الكُونْ بعشقْ الكاسْ

 ونْقُولْ ما كَاينْ باسْ …

ما كَاينْ باسْ

 ملي سَار غَمَّازْ لطيَارْ لبُوعمِيرَة رَقاسْ

 اسَايْسْ الحَسرَاف تيدخُلْ جْوَاهْ

ويرْكَدْ عَندْ راسْ

 وسَارت ذيابْ الغابةْ شَطَّاحَة بتْهلهِيلة

وسَرَّاحْ لكْسِيبةْ ناعسْ مع لخْليلةْ

علَى شَطْبةْ

 مقنَاطَةْ

عرَاشْها مْصِيدة لفرْكْ لحمام..

 تعْطَبْ..

 تَدمِّي

 وتخلِّي لماَرة فالقلبْ…

  نعالُ تلحسوا لكلاب الهَايفَةْ

وجبهتو مقلقلة تقلقيلة

 مْحاكْ مع ظَلُّو ويسبّحْ كل لِيلةْ

 بحْجارْ لُوطَى

 قبَلْ مَا نجْمةْ السَّعْدْ تهْزَلْ وتخْطَى

ولِوَلاتْ عظْمْ لكتَف لشعاب الغار

 ويبّْسَتْ عروق الما ء

 فوجه طَارفة ظَلاّلة هي اليوم  شوَّافةْ

تخمَّمْ..

تنجَّمْ..

وتْدِيرْ الليلة ..

ملُوكها بدون جَاوِي ابَرمُوا الكبَّة على كْحلْ ضْرَاوي

 وتصبح شْباكِيهْ فجنب الواد مقطعة

ويصبح حالوا جيلالي

ومقات العصر يتغنى بلهواوي

5

هَاذينِي هاذيني

نطرزالحلمة كلمة كلمة.. ونصيغ لقوال

ولِكَانْ بحرْ البارَحْ سار اليوم غديرَة …

غدا نلقْمُو القمْحةْ من الشّْعيرَة.ْ.

ويباتْ الزرْزُور فسْماهْ يدُورْ مْجاورْ الطِّيرةْ..

والى هَاذ المَدْوَزْ صَادّْ لشْعابْ  الغَابةْ

غِيرْ نترَحْمُو علَى شجَارْها

 والى الرِّيح تصَفرْ فلخِوَا

 شْكُونْ عندُو رْكايزْ الخِيمةْ  وَوتَادْها

 شْكون أمَّدْ القنديلْ بفتايلْ النُّورْ لتنْوارْها

شْكُونْ اباتْ حَاضِي لفرَاخْ فتغرَادْها

 غير أنا …

أو أنتِ يا لحْبيبةْ الغِيرَانةْ

6

هاذيني هاذيني

نشعل شمعة قبالت شمعة

فظَهَر كلْ هضْبةْ ظلاّلة على بحرْ مَعنادْ

 ونجارِي مْلُوكْ الجَّدبَةْ بلذْكارْ والتَّعدَادْ

 ونقارع بين زوج حجار

ونلوي نارهم فشوني

حتَّى نْرقَّعْ لسَانْ الحَال بخيُوطْ الشَّمسْ

  لسَارْت سَارْدةْ

7

هاذيني هاذيني

نسَاعفْ مَكتُوبي …نحْرَق كتُوبِي …

نورَّقْ ذنُوبِي…نتْلاَهَا بعجُوبي…

نوَلْوَلْ كيبغيت …نتْحيَّرْ كيبغيت…

 نشْعلْ النّارْ فعرُوقِي …

نْصِيرْ ضْبابَة …نصِيرْ قطْرَة مَاء …نصيرْ خْرافةْ…

نصِيرْ أنا نْصيرْ أنتَ ,…

نصِيرْ كل شِي نصِيرْ حتَّى شِي…

 المعاكسني بنظرة

نبعث ليه سلامي على شذرة من لحلام

نوريه كيف تنجر لقلام …

كيف يتقرا السلام…

هاذيني هاذيني