آفاق حرة للثقافة صحيفة ثقافية اجتماعية الكترونية
أنا اللى هُنت عليهم وهما لم هانوا
نسيوا اللى نسيوه فى الغربة وإتهانوا
مع إنى كنت الطريق وضفايرى برهانه
عدودة ليه يا بت..خلى العديد ليهم
وحياه مقاصيصى …حرمت أوضيهم
صبراً يا أل الشوق تفصيل ما أجملناه
الشر مش فى البدء
الشر كان بعدين
لما افتكر أدم إن الرجولة دين
لما إستهان بالضعف … ولا شافش قوة فيه
مع إن ضعف الحليم … ده أقوى شئ فيه
صانع رحى العدوان … والحرب كان راجل
وباسم كل الحروب … صارت الحياه راجل
وقالولك إيه فى الهامش
ظهور الآنثى فى الصورة دليل على المساواه
يا آه بتنزف وَهَّن
يشهد علينا الزمن
إن الآنوثة سما … ضُليلة ع الخايفين
وان الكمد انها … كانت أساس الوطن
فى جميع المخلوقات
وتحت أى ظروف
كانت الحياه أنثى
والآنثى رحم الحياه
وعشان تحافظ ع الحياه
إستكانت
إستسلمت
دفنت حقوقها اللى ماتت
لبست طرَح
وقلعت تيجان الملك ورمتها فى صفايح الملل
قالت لسى الراجل
يا سيدى
بكره أخَلف لك حبيبة
تلّون الاحلام بثورة
تقلب الآية بحنان
ويوم ما يجى الحق ساطع أوعدك…
مش هاظلمك
أنا واخده عهد م اللى حملنى الآمانة
إنى أنا الانسان فى ضحكته الآولى
لحظِة ما كَانت الآرض مِتشافة بسُهولة
لو شفت صَدرى حى حياء الآم
بيضم كل البشر … بيضمهم ويضم
وبرضو بيحب المناغشة ويطير بحريه
عطشان ساعات للصدى
محكُوم لآخر مدى بين اللبنْ والدمْ
غطيته من نظرِتك
وسَجنتُه من هَبلك
رغم إنه فى المبتدأ… هو اللى كام أمك
فَدادين غُنا للناس
فى المسافة اللى تحت الصدر لحد الصُرة
فيها إشتهاء القلبْ للمجهول
فيها إتحرق خوف اللى خاف م الموت
يا سر هذا الكُون مكَنُون فى أحشائى
إسجُد هنا خاشع فى العُمر لو مرة
وأنا فى إتجاه الهوس بالحنين عذبنى
ان اللى مش فاهم مكانتى برضو هو أبنى
عدّوى الهوس جاتلك من أب كان زيك
وكل ما أحصنك يتحور الفيروس
فاكرنى مَكنة فِشار بالنار ما بتحسِش
أنا أنثى يابن الورود اعلم انا البستان
أنا أنثى يابن الحَنان زهرة وشجرة موز
أنا أنثى يابن الهدير موجه وريح محظوظ
انا أنثى يابن العَطاء قِصة وقصيدة شعر
انا أنثى يابن الخيال سَمكة وجِنية
أنثى أنا وفى جنس إنسانكُم
أنا الوحيدة أنا ..
اللى جالها قرار بالغلق
وفاتحة باب الأمل لكافة جميع الخلق
