فتاوى/لــ حمدي نجيب

1- ماحكم من يقول الحقيقة لمن لا يملك الفهم . . ؟!
لو أنا مش فاهم أوى إيه اللى هيفهمنى
إنك تعيد الشرح ولاّ توهمنى
كل كلمة عكس الحقيقة سباحة ضد الحياه
إصطاد براحتك مؤمنيك
أنا ايمانى بكدبك صفر
هتدخلنى فى دوايرك وتفتى بإن شِعرى كُفر
حُد عندك
كل اللى جاى شفوى وكتابة
أفراح صادقة وزفة كدابة
قَميص السمَا واسِع على كُل من فى الأرض
لو لبسه حتى مين هايلق فيه لقلقه
أما عن جميع الناس اللى لسه مصدقة
فلأنهم عارفين العمر مش بعزقه
قول الحقيقة لكل الناس يلا إستثناء
لا تِناور ولا تهرَب وماتخافشِ م الأخطاء
2-هل كُل الكُفر سواء ؟!
إذا كافر بأحزانهم
ومؤمن بحزن الاسئلة
إذا ورودهم الدبوحة بتنزف عطر ع القمصان
إذا فرضوا الرِضا بالزِيف
وهتكُوا سَتْر أُُنثاهُم
وجَهل ونَعره وخداهُم
إذا خَموا فى زمن غيرهُم
إذا أطفالهُم إتقهروا وصادروا كُل تفكِيرهُم
إذا قالوا الخِيانة لا . . وما كانوا سوى خونه
إذا إتنفس رضيعهم مُوت وكَتبوا لنفسُهم حَسْنه
إذا إنتصروا بلا غَزوات
وعاشوا عُمرهم أموات
إذا إستنجد ضَعيفهم بيهم فما سَمِعوا
وضاع الحق فى ديارهُم وما إتوجعوا
إذا كَافِر بأخلاقهم
فأنت الطَيبُ الصالِح أبا إنسان
وكفرك فى الحالات دى . .
هو مُنتهى الإيمان
3-هل يبطل الخوف الوضوء ؟!

كان بيتوضى لصلاة الفجر
والتلفزيون من بالليل شغال
على شريط الآخبار الغبى
سبحة الموت بتكُر كَر
وعيون المذيع الموظف عند الكلاب بتشر شر
بإسم الحِفاظ ع الدَولة والآمجاد . . مات الولاد
لا ذنب ليهم على الإطلاق سوى إن الكبير قواد
والله العظيم تلاته . . قواد
طب يتنفسوا فين ؟!
عشان مايموتوش مسمومين
طب يروحوا فين . . الغلابة الطيبين
واللى يطلع دين أبوك من قَبره
العالم مِش حَزين
واللى متوضى النهاردة وشَكشِك فى ضلعتينه الضمير
بس خايف وبيحاول يحافظ على هدوئه
هو خوفه ده . . ممكن يبطل وضوءه ؟!
إحنا بندى رصاصة الرحمة للإنسانية
بنطهر العالم م الخطية
لما نتوضى بدمانا
يبقى هنصلى بأمانة
الشجاعة هى الأصل فى العبادات
ملكوت الايمان بيدخله الصادقين.