كشف/ بقلم نورهان صلاح مصر

بس يا سيدى ………. وبعد ما دفعت المصاريف
وأخدت الكارت …. قالولى : روحى الاوضة اللى
هناك دى علشان تكشفى ……. قلت لهم أنا صحتى
كويسة .. وخالية من الامراض الصيفية والشتوية
والحمد لله …. قالولى : لااااا ده كشف تانى .. تعرفى
كشف عجينة …. قلت لهم طبعا . تيته الله يرحمها
كانت تكشف عن العجينة علشان تشوفها خمرت
ولا لسه …… هوه أحنا داخلين فرن بلدى .. ولا
جامعة . ؟؟
.. الدكتور فشخ ضبه وقعد يضحك وقال : كشف
عجينة اننا نكشف على كل طالبة ونصورها للتوثيق
ونرسل الصور للنايب عجينة .
قلت : يوه ………….. يادى النيبة ياولاد هيه العجينة
بقت نايب فى البرلمان .. ما يودوها الفرن ويعملوها
عيش محمص . ويوزعوها على البطاقات الذكية .
الدكتور ضرب كف بكف وقال : يا ستى عجينة ده
يبقى نايب فى مجلس النواب . وطالب ان يتم الكشف
على كل بنت داخلة الجامعة . وبعدين يبعتوله الصور
على مكتبة فى المجلس .
.. رحت حاطة ايدى فى وسطى وقلت :
.. احنا أحسن حاجة . نضيف مادة فى الدستور
بضرورة الكشف على كل عضو من أعضاء المجلس
الموقر للتأكد من قواه العقلية .. والبحث فى تاريخة
للتأكد انه صاغ سليم . يعنى مش بتاع السيكو سيكو
لأن بعض أعضاء البرلمان طلعوا بتوع السيكو سيكو
وده بيعرض سلامة المجتمع . وبيخلى فضيحتنا
بجلاجل فى اوروبا والدول المتقدمة . والخوف كل
الخوف ان يطلع نايب . يتقدم بقانون بإباحة زواج
المثليين .. وطبعا المجلس سيد قرارة .
.. ورحت سيباهم وماشية .. راحوا جاريين ورايا
الدكاترة تجرى . والممرضات تجرى . والفراشين
تجرى . ورئيس الجامعة يجرى والعمدا يجروا .
ولما وصلت للشارع اللى فيه مجلس النواب .
النواب بقوا يجروا .. ورئيس المجلس ماسك الشاكوش
بتاعه ويجرى ويقول :
حلق يا ولاااااه …. هاتوا البت دى . يا شاويييييش
يا بوووووووليس .
…. وأنا حمامة ….. على الدكتور عكاشة .
…… أه والنعمة زمبؤلكم كده .