آفاق حرة للثقافة صحيفة ثقافية اجتماعية الكترونية
الضوّ لِ نْرَسَم حِرفه
ع جفون متل الشمس
عَ مشلح خيالِك
ما الضوّ لِ نْقَسَم نِتفِه
ع الضوّ … ورا نِتفِه
كلّو إلِك
مين قاسمِك يا حلوتي
عَ الضوّ … عَ حالِك
شفتي وان ما شفتي
الضوّ من عيونك مَرَق
صبح وصار يضوي فَلَك
والصبح مش صُدفِه
صُدفِه ان عِلِق
بالضوّ ل لي فِلِت إلِك … وسَلَك
ما الجوّ الهايم …هِلِك
وسارح عْلَى حالو
ضاع لِمّن تمرّى بنِدي
حْوَالِك
وحواليكِ الضوّ
لِّ نْحَبَس ع بالو
مين شارَعِك عَ الجوّ ؟
وهجِك نَبَر بالشمس
مش هيك بيكون الدفا
عطرِك سكت بالهمس
وسحرك رضي باللمس
ع الارض مِشي بالحفا …
وِبَعْدِك بتعاتبي
يا حلوتي
ع الضوّ …
ما الحلا
جسمِك …فلاّ
عطر ودهب غلاّ
ما الضوّ …
قطعة سما قلاّ …
مين ل قلِّك انو الحلا
زنّار …
وزرار … عَ صدرِك
مين قال الفجر
ختيار …
وبينام … ع حضنِك
مين قال وَقْد النار
نفَس من ضلعِك
مين ل سرق لْ خبار
تْخمِين هَيْ امِّك
ورد لْ كِبِر بالدار
صار وقتو
يشهقلِك
جرح العمر ل لي صار
وفلّ …
من قلبو يشهَدلِك …
