بيت/بقلم:مصطفى الجارحي ( مصر )

بيت
وساعة حيط
ما بتدقش
وموجة في لوحة تتكسّر
على قلبي
يرد الشيش
وما يردش
وقهوة وشّها مشروب
جواب وكأنه مش مكتوب
ونجمة من لهب تنزل
على قدّي
على خدّي
وانا قاعدة
عينيّا بتشرب الوحدة
في بيت
وساعة حيط
ما بتدقش
***
وكان تحت الندى
وردة
تشد عنيّا للشباك
ونجمة في المدى
شاردة
تراقبني وتستناك
تصبّر قلبي ما بيهدا
وانا قاعدة
عينيّا بتشرب الوحدة
في بيت.. وساعة حيط
ما بتدقش (!)