آفاق حرة للثقافة صحيفة ثقافية اجتماعية الكترونية
كي رجعت لدار لعشية لقيت (ماني) مسكينة قاعدة وسط القصبة حزينة خبات لعلام في عبونها و حطت راسها على كتفي شحال كان ثقيل .
في الليل ماجاهش النوم قالت لي أرواحي نحاجيك كيما كنت صغيرة نحكيلك على الغول الي سرق الغزالة الزينة
كنا حباب وصحاب الجار يخمم على جاروا ورغم الفقر كان الواحد فينا يعرف كيفاه يجوز نهاروا بصح الفقير مرجعش يقدر يصبر والمريض ملقاش وين يداوي والغني بخير البلاد يتمتع ويتبختر
واحد نهار
خرجوا الصغار قلبهم تعمر كي شافو حلمهم يدمر
مكانوش يعرفوا صلاحهم كسروا كل شئ .. كل شئ في طريقهم تحطم وتخسر والخداع كان مخبي قلبو حجر مايتكسر
خرج الراجل الطيب صاحب الشعر لبيض حاكم لبلاد قالنا أسمحولي
راني نفكر نفتحلكم بيبان الحرية والكل رايح يعبر ويهدر
وفاتت أيام وشهور والناس فرحانة
والشعب تنور
بصح دخل بينتنا غول متستر وباش يفرقنا قسمنا سادت الفتنة وصحاب الشر
سال الدم بين الخاوة بكات البلاد والحقد تفجر
الناس رجعت تخاف تخاف تخاف
والحلم رجع كابوس بالموتى يتعثر
صدفة جابونا راجل عرفناه بالأمس كي مات صاحبوا حاكم لبلاد لقديم خرج وسافر
قالونا هذا منقذكم فرح القلب لحزين واستبشر
هللنا صفقنا وغنينا
وسكن مولانا المنبر
فاتت لعوام
قلنا خلاص
الراجل مرض
رايح يرتاح ويغادر
الشعب تعب
الفقير زاد تفقر
الشباب
سكن الموج
هارب من حضن يماه باش يقطع لبحر
باش يعيش
كي الناس
الى بحريتها تفتخر
مرجعش يفهم
واش راهو صاري في بلادوا
الى تاريخها
حكاية كل البشر
وسقط القناع والغول تكشفت وجهوا
كي غابت لغزالة
عن النظر
خرج الشعب نهار الجمعة حامل شمعة
على خدوا دمعة
ومازال
ومازال
ومازال لليوم
ينادي
يالغول …يالغوالة
أطلقوا سراح لغزالة
