آفاق حرة للثقافة صحيفة ثقافية اجتماعية الكترونية
مصر اللى حِبلت وولدت خارج قانون الطلق
ورغم كل الاغراءات اختارت مكان فى الشرق
وكان قدرها المرير..تهضم بلاوى كتير
وف لحظة الابهار تقف فى نص الحلق
عايز لك أم يا نصر
خدلك أم من طنطا
مِد إيدك ف صِدرى..
وخُد مُفتاح الحياه
إفتح مخازن أبوك وارثها عن كابر
وإقطع لسان الوضيع بالجهل بيكابر
إرتعشت إيديه م الخشوع
لما لمس جسمها
برديه مطبقة ف صٌره جوة ممر
ملفوفة وبشمعها
مكتوبة للموعود
ماكنتش صعبة وماكنش فيها رموز
مصر يا نصر
مصر بس يا ست الناس؟
ماهى مصر أم النبع اللى سال إنسان
ومصر الآن لازم تقول كلمة
يعنى أنا الكِلمة يا مايا؟
ايوة يا ضنايا
نصر إنكشف عنه الحجاب
وأهل الطريق ليهم فى العذاب مسلك
واعِر كلامك أوى
وباين على شكلك
المقصود ما بين الأمر والعلة
مسافة فهم
والفِهم يطرح ثمر
واخد زمان فى النضج
وجِذر هذا الطرح
شارب من المَنهل
يرشرش عليه الضى
يبان وضئ أسهل
إنت اللى زارع عنب
هو اللى صنعه نبيذ
فيه اللى قال إنحرف
فيه اللى قال دا لذيذ
وما بين وبين مطلوب
تحسبها م الاول..
مرسال أبويا جانى
ما بين الحلم واليقظة
قمت بعد ساعات
لقيتنى مش فاكر
ابويا بعت مرسال
مع شخص مابحبوش
رجع وقال لابويا
انى ما صدقتوش
حرمنى أبويا
من نعمته وفضله
ما قالش ليه حرمنى
وأنا ما سألتوش
آخر حدود اللغة
تمانية وعشرين حرف
أما المعانى كتير
المعنى يليق بإله
أما الكلام على حسب
يعنى ابويا
أهم من مرساله
ولانى كنت معاه
بتعشى ع الطبليه
وطبق العسل شاهد
على روعة النية
خُد المفاجأة بقى..
أبويا ما حرمنيش
أصم عاوز دليل
على طلاوة الصوت
وقطتى السِيامى
ما إستطعمتش التوت
أقنعتها إقتنعت
مع إنها أصلاً
كده أو كده هتعيش
وبعد كام أكله
هاتدوق غباوة الموت
وبعد كام خطوة
نصر إتخبط فتوى
كافر
جحود
زنديق
وفى المحكمة إعترف
بالتهمة وزيادة
أيوة يا حضرة القاضى
كافر أنا بالدجل
فى حضرة المولى
وقصاد جلال العقل
لا قوة ولا حولا
أما عبيد النقل
كلامهم ما يلزمنيش
جاحد أنا قلبى
ضد السكات كله
زندقت مرة فاكرها
على حبة الحرافيش
أما عن اسباب
وجودى قدامك
لقيت قبور العباد
مفتوحة ع الشبابيك
وإنت عارف فضيلتك
أضرارها ع الصحة
وخصوصاً الأطفال
بلد عيالها تُموت
م الرَضعة إفطُمها
وعمارة أيلة للسُقوط
بإيدك إهدمها
إقتل حُروف الجهل
لجل المعانى تعيش
وحُكم المضارع حسب وضع الحروف قبله
مكتوب عليه فى الآزل يقاوم الماضى
ولآن ده ماحصلش
يا حضرة القاضى
محكوم عليك النهاردة إنك ماتنصفنيش
مستنى أتولد تانى
اكمل خطى الحُرية
المرة دى هموت
من غير قصاصِ ولا دية
هاسيب لآمى إزيس حبِة كُتب حَية
وهو ده المَكتوب فى أول البردية من ديوان لجل المعانى تعيش
