آفاق حرة للثقافة صحيفة ثقافية اجتماعية الكترونية
أسامحك على إيه
و أنسى منك إيه
و إنت خدت عمرى
و أجمل حاجة فيه
أخدت منى فرحى
و هربت من لياليه
أسامحك ع ال كان
و لا أنسى فيك زمان
توهنى شوقى فيه
اعاتبك ع ال هان
و دمعى ليه كمان
ياما قتلنى هجرك
إزاى قلبك يطاوعك
ياخدك لغيرى غنوة
و عيونك ليه تدلك
و تقول
لغيرى حلوة
قصدك تذل حبى
و لا تلعب بقلبى
إن كان ياروحى قصدك
خلاص الذنب ذنبك
روح إعتذر لنفسك
أنا مش ممكن أسامحك
و لا قلبى يوم يقول لك
آسف … و يعتذر لك
فرشت ليك رموشى
ضلة
خليتها إنت نار
فردت ليك ضلوعى
شراع
و النبض بوصلة إنت
إخترت الدمار
رسمت لك جبينى جنة
و نن عينى كحلها الإنتظار
كل دا و قلبك قاسى
غدار
يا قلبك بتخاف الإعتذار
تكره لوم الأحبة و تشوف
عتب المحبة ظلم و هجر
و مرار
طب قول لى ليه أعاتبك
و إزاى قلبى يسامحك
و إنت مولعها نار
يا تجينى و تعتذر على
بساط المحبة قبل
طلوع النهار
او إنسى إن حبيبتك
يلا … يلا خد لك قرار
——— جاردى ———
بقلمى——–
الشاعرة جهاد نوار
عن محمد صوالحة
