آفاق حرة للثقافة صحيفة ثقافية اجتماعية الكترونية
الشباب مرحلة من مراحل العمر ، مش قتب طلع لك لوحدك فوق عند قفاك / ولا عمود فقري زيادة كسبته من فودافود او أورنج ، ولا نيشان أخدته وانت مأنتخ ومتنبل من علي قهوة سامبو بعرق ابوك الشقيان من طلعة الشمس لحد متغيب ، و حتي بحق خواتك البنات اللي مستني يجوزا ويسبولك الشقة تتجوز فيها .
المرحلة دي بقه : اللي أكبر منك عاشوها وعرفوها كويس ، ومنهم اللي سبر أغوارها تماما ( حلوة سبر طبعا ، نعدي دي ) وقاعد بيتحسر علي حاجات كتير كان ممكن يعملها ، وبيحسب في كمية الحاجات اللي فلتت منه وكانت في الكف علي رأي أمل دنقل ، وحجم الطاقة اللي استنفذ دون أي انتاج .
واللي أصغر منك بالتاكيد حيعبروها بعد حضرتك متنتقل لخانة تانية – هيا ايه ؟؟!!الله أعلم ) ، بس وفق تنبلتك وعدم وعيك باللي في ايدك أرشح لك مرحلة الادمان والأكتئاب ومن ثم الانتحار أو الانتظار ، بس قبل متنتظر مضطر أعرفك ان – جودو مش بييجي في الغالب ، ( حتقولي وبشروا ولا تنفروا هههههههههههه ) حقولك التعميم مفسدة والبعرة بتدل ع البعير ، والاشارة بتجيب البشارة .
المرحلة دي مش بتديك ميزة علي أي حد ، ولا حتي حق غير حقك غير بالجهد والعرق والوعي ، والانتماء لأي معني وقيمة مهما كان حجمها ، وساعتها ممكن تلاقي لكل شيئ بتعمله متعة ولذة مجربتهاش قبل كده ، وتحقق مكنتش بتحلم بيه ، والدنيا بتنور قدام عنيك ألوان مبهرة مكنتش متوقع انها موجودة أصلا، وتبطل تبص للراجل الشقيان العرقان من أول خيط للشمس علي أنه ممول المشروع الفاشل اللي هو حضرتك ، وانه سبب ثقب الأوزون ، أو كسر مناخير أبو الهول لما كان مع روميل في الحرب العالمية التانية .
لقمة العرق لذيذة ، ولقمة التحقق والتعرف علي الذات وطبيعة المرحلة ألذ
والحياة بطبيعة الحال : زرع ، حصد .
