طل الفجر.. بقلم : أكرم صالح الحسين

>>>>>>طل الفجر>>>>>>
طل الفجر والنور عبا هالدني
بعدو القلب تعبان يسأل شو بني
طل الفجر لسا العتم سهران
يرجع ليالي الشوق وقت الولدني (ة)

عم يفتح شبابيك سكرها الزمان
يحكي قصص ما عاد في الها مكان
حتى سنابل هالقمح صارت زوان
ما عاد يقبلها حجر هالمطحنة..

معقول هالأرض اللي نشف ترابها
يرجع مطر كانون يطرق بابها
والياسمينة ال سمموها صحابها
ريحة عطرها فوق صدري ساكنة..

ياريت أيام الطفولة بتنشرى
حروف العمر ترجع لقلب المحبرة
مشتاق إرجع شي ألف وقت لورى
وبحضن أمي نام ما أوعى بسنة..

مليت من كلشي وما عدلي نفس
متل الورد شوك الدني كلا لبس
محكوم ظلم وقاعد بجوى الحبس
والقفل صدى وطلعتو مش باينة..

تعب الوجع من شكوتي تعب الحكي
ومليت من عتم الليالي الحالكة(ي)
ما في صدر أرمي همومي واتكي
فوقو وقلو هالعمر شو هدني ..