باقي وباقي / بقلم : فوزية أحمد الفيلالي

باقي وباقي
باقي الجمر راكَدْ
تحتْ ارْمادْ العْمرْ
باقية الحنّة لاصقة
فْ جْنابْ الضْفرْ
باقي الحل ف الحلاقي
والدنيا صغيرة وتلاقي
باقي يا قلبي تصبرْ
لا تقول ظْهرْ صبْري تْضْبرْ
بلسانْ الحالْ تشتّتْ الكَمرة
حرارتْ التّمرة
في جوف الزّمانْ
المحنّة تعرّاتْ
والضحْكة تخدعْ الحيّة
السم يقطر من تحت جبح العسل
الشمس غربتْ في عقدة الايام
والقمر في شونو تْخبّعْ
اعلاشْ اصبْري اتْعاديني
راسي حجرة ثقيلة
والهمّْ يسقي فدّانْ
دموع وقطران
النادر واقف
والنمل من جوعو تالف
القفة عامرة والنسر
ف عبونو فكعان
باقي وباقي مايْتْقالْ
ف اصبح بسوط غربي ويسلان
وف العشية يتجمع
على حروف الجامع
بوجعران والضربان
الفقيه يأذن ف لعلالي
والنياء تمد يديها لحناني
وأنا مالي او مالي
ندور كيف الحلم بين الدفالي
ونقول حتى حد ما بحالي
نساوم البحر
على داك انهار الي غفلني
وسرّد كتّاني
ورقتي في بدّي تلالي
خروفها فازكة
من حرقة الصهد
تبكي وتشالي
فوزة الفاسية