عارف / شعر : الشاعرة الدكتورة منال الشربيني – مصر

عارف
لسه البنت الماسكة ف ديلي
بتكتب:”بااااب”
واقفة ف عرض السكة وشايلة
ف ايدها “الف كتاب”
كتبت مرة:
” مفيش اصحاب”
ولمت كل كلام الحب
ونقشت” غاب”
لساها شايفة ف قلب النهر
غيوم بتجر ف ايدها سحاب
اصلها شايفة بطول العرض
الكل تراب
لما يصحح يقلب روح
واما يموت يقلبها عذاب
وساعة يكلبش فينا “وطن”
وساعة يمثل يبقى سراب
ولسه ياعيني البنت النونو
ماسكة ف ديلي بتكتب”باااااب”