اوجاع سودانية/ بقلم: ياسر زمراوي( السودان)

فرادي في حزني
في قولي زي رادي
تتوزع الاخبار عن بلدي يوماتي
للغادي والصادي
يبقي الحزن عادي
والموت عدو الروح
متشابي متمادي
قبال ده بي يومين
غنينا لي دارفور
لما الوجع زي زار
والدمعة زي دستور
الليلة في السهلة
في النيل وفيا الوادي
اتخاصموا اللصين
الا السرق يوم بان
بان بي رصاص دانات
واتوجع الشادي
يا خالد السنهور
يا وردة طلت يوم
من بين شقوق السور
بي عطر حدادي
مدادي مدادي
تعزف فرح مستور
من بطن ست الجيل
لمان تزغرد دور
يبقي الفرح نادي
مدنية بعد النار
يتمدن الاسوار
تتهد حيط الخوف
تبقي الحديقة حروف
تكتب مهيرة جروف
بي طمي شارع الناس
والمابشوف حيشوف
سيرة الوطن متراس
والطفل متهادي
بي خطوة موسيقي
لي ناس بعد ضيقا
اوجاعا تفريقا
دم شابي في الشارع
جوع ماشي متفارع
خوف سكن في عيون
الشافعة والشافع
يالله يا رحمان
بلدا بلما الحب
والسترة والحبان
بس مالمتا الكلمة
والاتفاق الشاق
في طرد زي الورد
للظالم البادي