آفاق حرة للثقافة صحيفة ثقافية اجتماعية الكترونية
١
ليل على ليل
و القلب ساند نفسه
لأحسن يقع من الحزن
لف الشوارع و الحواري
و قال طظ
طلع لسانه و زعق
و جبينه نزل عرق
غسل الروح
محى خطاويها الغلط
نفس الليل في يوم تاني
كوى صوتي
و طبطب على الحنجرة
دق المسامير في العنين
اللي شافت كل حاجة و سكتت
نام الليل فوق وريدي الشمال
و حلف لازم انام جنبه
اصله خايف من ليلة
يكون فيها مش هو الليل
ما هو نفسه زي كل مرة حضن
و باس الحتة السودة اللي جوانا
حتى حبيبتي ماتت قبل ما تحني الليل
و تغسله بدموعها و تعطره بالورد
۲
حبيبتي ماتت زي ما الشمس
ما ماتت
و هربت من دروبها
زي ما الازهار ما طرحت ربيعها
و رقصت من كتر الخوف
حتى القمر هز شعاعه و بكى
تعبت العرافة من الشوف
حبس الصوت نفسه لحد ما تعب
لكنه خرج عفي يقول لأ
كما اللي خرج من بطن الحوت
و ربط روحه و كتفها على
شريط القطر
انتظر موت مش بيجي غير فجأة !
بيتر ماهر الصغيران
