آفاق حرة للثقافة صحيفة ثقافية اجتماعية الكترونية
رغم انه..
مش كتير مؤمن بحقه في الولاده
إلا انه مكتفي بتلاته م المريدين
واحد يحب فيه الشِعر والحكايات
وواحده تحب فيه الضي طارح
تالت يراقبه جوه خرم المعرفه
عل وعسى يرتد ليه بصرُه
تلاته ده نفس الرقم
اللي ملازمه من كل اتجاه
دورة حياته ميلاد وساعة ثم مات
التماس مربك تلاته الفجر يعرف ربنا
وتلاته العصر يكفر بتقل دم الناس
و ده لأنه مش زي الجميع
يدخل مع العجان فرن الفُرص
ياكلوه نياب و سنان قرار
عند الإشارة تلات دواير فيها اصفر يخنقه
مشروع ومستني التلاته في سكته
وتلاته باقي الأجرة دايما مشكلة
ماضي وحاضر كان تالتهم بكره غايب
وفصول حياته تلاته مفهمش الربيع
تلات سجاير في العلبة بتشكل خطر
تلات- طقات – دورة حياة أقدم سؤال
جايز يكون أقدم من كيف بدأ الخلق
سؤال اجابته: اي حاجة
السؤال، راح ناكل ايه؟
تلات- طلقات – كفيله ماتصيبش الهدف
لو كان راميها كفه بيترعش
وتلات – طلاقات – كفيله تنهي المسألة
لو كان راميها قلبه حديد
تلاته جوه الكهف مين عَدهُم
أركان تلاته مايستروش يوم الصراط
ربك كريم وأكرم من حساب ورقة وقلم
الرابعه للي معاه، والخامسة بس من استطاع
وأركان تلاته في اوضة برضه مايستروش
الحيطة الرابعه هي حيطة الباب
تلاته لو تعرفهم تكتمل ليك الولايه
صحفي ومعد وعضو من جوه الكيان
صحفي يحطك عافيه في عنين البشر
ومعد بَروِز تُرَّهاتَك والخبَل
والعضو لجل التزكيه والإلتحاق.
