دِيكْ الطفْلَة/بقلم:ماجدة الفلاحي

دِيكْ الطَّفْلَة
الِّلي فِخْيَالِي
مَا تَهْدَا مَا تَسْكُتْ
وَاخَّا نْدِيرْ بِرَاسِي مَتْ
كتْوَشْوَشْ لِي فِي وَذْنِي
كَتْلْعَبْ وَتْسْلَّى
مَرَّة تَحْبَسْ مَرَّة تْهْمَسْ
وْكُلْ مَرَّة تْقُولْ
سَمْعِي مَنِّي الْمَعْقُولْ
مَا يْهَمَّكْ عَامْ مْشَى
وَلَا عَامْ جَا
مَا يْخَلْعَكْ نَقَصْ
مَا تْغَرّْكْ زْيَادَة
سَمْعِي كْلاَمْ الاِفَادَة
لَا تَّيْقِي خْرايَفْ نْوامَرْ
لَا تْلَبْسِي لباس العجز و لَكْبَرْ
وَلا يْلَبْسَكْ وَسْواسْ لَعْمَرْ
خَلّينِي فِيكْ سَاكْنَة
يولي قَلْبْك خْضَرْ
بْحَالْ رْبِيعْ
يَنْبَتْ فِيهْ وَرْدْ وَزْهَرْ
بألْفْ لَونْ ولَونْ
خَلِّينِي نْكُونْ امّْكْ
وَتْكُونِي بَنْتِي
خَلِّينِي فِيكْ
وَبْقَايْ انْتِي فِيَّا
صاَدْقَة وَوْفِيَّا
يَدِي فِي يَدكْ
دْرارِي صْغَارْ
لَّعْبُو وَنَا وَيّاكْ
مَرَّة نْغْلْبَكْ
مَرَّة تْغَلْبِينِي
نْغَضْبُو
نْتْخَاصْمُو
نْگلُوهَا
وَنْضَحْكُو عْلِيهَا
غير أنا وانتي
غير انتي وأنا
خَلِّينِي
مْكَمْدَة فِيكْ
بَيْنْ الضْلُوعْ
نْوَلْدَكْ مْعَ طْلُوعْ
كُلْ شَمْشْ
بحال النهارمْنْ جْدِيدْ
نْبعَّدْ عْلِيكْ
ألْهَمّْ
وَالشَّرْ
وَالْغَمّْ
لِّلِي كَيْضُرْ
خَلِّينِي فِيكْ
رُوحْ طَفْلَة صْغِيرَة
نْحْمِيكْ مَنَّكْ
ؤُمَنْ غْدَرْ لْخَلْقْ
مَنْ كْمَاشْ لْكْبَرْ
مَنْ صَهْدْ الْوَقْتْ
خَلِّينِِي سَرّْ ؤُمَلْحْ
تَحْتْ الْخَد ْ
مَا عَرْفُو حَدْ
خَلِّينِي ونْخَلِّيكْ
وَحْدِي نَعْرَفْ
وَحْدَكْ تْعَرْفِي
هاد السّرْ
لِّلي فِي قَلْبُو طَفْلَة
عَمْرُو ما يَكْبَرْ.