تعيشي يا مصر / شعر الشاعرة المصرية : الدكتورة منال الشربيني

يا مسحورة يا ماذية
يا متاخدة على خوانة
ولا حدش شكر لك خير
ولا حدش
ف عز ما انتي موجوعة
حفظ لك سر

تعالي اعزمك ع البحر
وتنسي ان انتي لابسة حداد
على امبارح
حاجيبلك ريشة م النورس
واجيبلك “لب”
وحاجمع لك عيال ياما يلاعبوكي
وحاحكي لك عن اللمة وعن المراجيح
وحاعمل لك مراكب نور من الضلمة
وحاصيد لك موج بيتدحرج ف ” غزل بنات”
وحاكتب جوة كراسي:
” دا للذكرى،،
تعيشي يا مصر”