آفاق حرة للثقافة صحيفة ثقافية اجتماعية الكترونية
“سعد الله ونوس مسرحى سورى عبقرى قال كلمة المسرحيين فى العالم وهو مريض بالسرطان ومات بعدها قال:نحن محكومون بالامل ولايمكن لهذا اليوم ان يكون نهايه التاريخ فكتبت هذه القصيدةفى مرسى مطروح (فى تفسير مقولته)”
الليله دى هموت..
وأنا مش شُجاع لدرجة مايهمنيش
بس اللى عِشناه جميعاً يؤكد .. وعن درجة من درجات اليقين
إن اللى هيحصل بالضبط كالتالى:-
هخاف شوية وجسمي هيسيب حَبتين
هاستنجد بدرجة وعى محفوفة بمخاطر غامضه
هانزع نفسي من قلق الوقت اللى جَيّ
هقول لنفسى … نام
اظبط منبه موبايلك ع الساعة عشرة الصبح
ج س م ى ………بيحاول يعيش
الموت زرع ألغامه فى كُل شَرايين الآمل
درجة انتباه العقل معطله التوقيت
الإنفجار فى إتجاه الخُوف هو الحل الوحِيد
فتح النفق الرهيب
حاولت أقاوم إنجذابى للفراغ
أتارينى سبت الفراغ خلفى مُسجى ع الفِراش
جمهور المسرحية مش مصدق إن العرض إنتهى
وإبتدا العرض الجديد
دلوقت
أنا الجمهور
واللى فوق المسرح نوعية تانية من الشخوص
والنص مكتوب بحرفية مذهلة
هو أنا ع الآرض كُنت بعمل أيه
مش إنت اللى قولت يا سعد تعدد النهايات بيعنى اللانهاية..
إنت اللى قلت الكِلمة بشهامه
وإحنا بنقدر شهامتك
شوف يا سيدى
كل الثوابت متحركات
بمنتهى الثبات
إنت كنت فى شرنقة أنسى قوانينها
وإنسى كمان العِشرة اللى كانت بينك وبينها
كل ألامك القديمة كانت مجرد جرح سطحى
كل زمان وليه مقام
واللى قالوا لك عن ضرورات النتقام
هيندموا كتير إنهم فهموا الكلام بالشبه
على فكرة يا سعد
إنت الوحيد اللى إنتبه
قد أيه الرحمة أوسع م العقاب
بين الحياه والموت مسافة م الأموات
اللى تعب فى النص
بعت لنا إشارات
صحيح محتاجة لشروح وفيها وجهات نظر
لكنها…
فـ إكتمال الصورة فى الآفق البعيد
بتكمل الآسئلة
عَصْر الإجابات الكاملة … إنتهى للأبد
والدليل إننا لسه بنتولد
على الأقل فى الجغرافيا
وأديك بتفهم فى اللغة اللى ماتعلمتهاش ع الآرض
محْكُوم علينا بالرضا ومحكومين بيه
حتى المُوت اللى مش عارفين له سبب … رضينا به
والفقير … الفقير اللى مش لاقى العَشا
بيحمد الآغنيا عليه
سايبين حاجات مُهمة جداً … وجايين فى الفارغة نتصدر
محكُومين بالآمل
بالمُحتمل يبقى شِفا
وإحنا فى صراعنا مع الفناء
بنكسب جولة والتانية. .
واللى بيكتب عن خسارتنا للجوله الآخيرة
قلبها حصة فلسفة
فاكر وإنت ع الآرض
جربت تنقل حاجة بالبلوتوث
لإنتقال الفكرة أوسع
يشبه البلوتوث كتير
دلوقت فى الجغرافيا الجديدة
مفيش عله ولا معلول
والزمن موجود . . بس بسرعه رأسية
منظوره للأشياء مجسم لدرجة
إن أول إمبارح وبعد بُكرة
على منحنى نقطة صعوده . . هبوط
يعنى التاريخ اللى انتهى
لسه ما إبتداش
يعنى إحساسك بالزمن وهمى
وإن كان خيالك على قد حالك
هيبقى الزمن معدُوم
تلاشى الزمن
عند أينشتاين أول العداد
والعكس دايما مش صحيح
لأن التضاد مهما كان . . عنيف
فرعين شجر على جِذر واحد متكلبشين
فى الآرض عندهم فى الثمر أيات
إحنا مصممين ننحاز لشئ
واللى أعجب من كده
بنموت دفاعاً عن إفتراض
مع إن الفرضية الوحيده اللى ممكن تكون صحيحة
إننا نعيش . .
ولا يمكن لما يحدث اليوم أن يكون . . نهاية التاريخ
